شوبير محمد هاني حظه كان وحش رغم الاداء القوي له

مصطفى شوبير: الحمد لله كنت مذاكر إن ميسي متعود انه يدخل براحة وهو بيشوط ضربة الجزاء يستنى الحارس يتحرك ويحطها عكس الاتجاه، هو معملش كده لانه كان مضيع اللي قبلها بنفس الشكل، انه دخل براحة فالحارس وقفله ومتحركش فحطها برا خالص، فانا سألت نفسي هل لو جت ضربة جزاء هيدخل براحة ويستناني ولا هيشوط مرة واحدة؟ لما حط الكورة ورجع واتحرك فيه خطوة وسرعة معينة فهمت منها انه مستحيل يهدي وانه خد القرار هيشوط مرة واحدة فقررت اني هروح النحيادي والحمد لله ربنا وفق وطلعتها.

مصطفى شوبير: لما هاني جاب جون فينا تاني مرة، قلت جوايا تاني، اللي هو انا زعلان عليه عشان حظه وحش لان في الماتشين اللي جاب فيهم اجوان كان بيبقى عامل ماتش حلو جدا بس الحمد لله انها كانت بتعدي على خير في الاخر ومش بنخسر.

مصطفي شوبير: من الصدات الحلوة ليا في المونديال هو تصدي نيوزيلندا ، كنت بقول لياسر ابراهيم شييييل هو سمعها شوووبير فـ كان فاكر اني طالع امسكها فـ هو سابها والمشكله اني كنت بقوله شييييل 

مصطفي شوبير: مرموش في التمرين لما بيفكر يشوط احنا بنخاف علي ايدنا من التسديد بتاعه ، مرموش رجله تقيله جدا في التسديد ، ومرموش لاعب كبير وهيشيل المنتخب السنين الجايه كلها ، هو كان عنده سوء توفيق في المونديال

عمرو اديب: زعلتوا انكم خسرتوا الدوري الموسم اللي فات ؟
مصطفي شوبير: طبعا زعلنا ، عشان ده مش العادي
عمرو أديب: ليه مش عااادي ، نفسي افهم ليه الاهلاوية والأهلي مش قادرين يفهموا ان الكورة ممكن تخسر فيها بطولات عادي 

عمرو اديب: تاعبين ابوك وبيفضلوا يقولوله انت احسن

مصطفى شوبير: انت ايه رأيك؟

عمرو اديب: انت احسن من ابوك

مصطفى شوبير: شفت بقى يبقى مش تاعبينه ولا حاجة ما انت كمان شايف كده، بس عموما كابتن احمد شوبير حارس كبير وانا اتشرف اني مصطفى أحمد شوبير

مصطفى شوبير: الاحتراف حاجة مهمة لاي لاعب بس في الاول والاخر انا بلعب في نادي كبير النادي الاهلي ولسة عندي عقد مع النادي، واي قرار هيحصل هيكون بالاتفاق مع النادي واللي النادي الأهلى شايفه هو الصح اللي هيحصل.